5 katao sugatan sa landslide

MANILA, Philippines - Lima katao ang nasugatan matapos na gumuho ang mabatong bundok sa Brgy. Tadiangan, Tuba, Benguet kamakalawa ng hapon.

Kinilala ang mga nasugatang biktima na sina Rogelio Arellano, Abrelio Wagney, Elpidio Balanguey, Janal Daligdig at isang nagngangalang Belano, pawang mga residente sa nasabing lugar.

Ang mga biktima ay mabilis na isinugod sa Baguio General Hospital and Medical Center  upang malapatan ng pangunahing lunas.

Sa ulat ng Tuba Police, naganap ang insidente sa nasabing lugar dakong alas- 3 ng hapon.

Base sa imbestigasyon, kasalukuyang abala ang mga biktima sa pagpapatag sa lugar upang pagtayuan ng isang elementary school ng mangyari ang pagguho ng lupa at malalaking tipak ng bato.

Kasalukuyan namang ina-alam ang sanhi ng pagguho ng lupa dahilan bagaman sobrang lamig sa lugar ay hindi naman umuulan dito.