Lady lawyer ni Mayor Climaco itinumba

MANILA, Philippines - Napaslang ang lady lawyer ni Tungawan, Zamboanga Sibugay Mayor Randy Climaco makaraang pagbabarilin ng mga di-kilalang lalaki sa Barangay Libertad sa nasabing bayan kamakalawa ng gabi.

Kinilala ang biktima na si Atty. Jocelyn Vercide Luna ay nagsisilbi ring Municipal Tourism Officer sa nasabing lalawigan.

Sa ulat na nakarating sa Camp Crame, naganap ang pamamaril sa loob ng bahay ng biktima sa nasabing barangay bandang alas-9 ng gabi.

Ayon sa imbestigasyon, nagpapahinga ang biktima sa loob ng kaniyang tahanan nang pasukin at ratratin ng mga armadong kalalakihan.

Narekober sa crime scene ang mga bala ng M16 Armalite rifle habang patuloy naman ang imbestigasyon.