Uniform ng MNLF, nasamsam

MANILA, Philippines - Nasamsam ng mga operatiba ng pulisya ang mga military uniform na ipinatatahi ng Moro National Liberation Front (MNLF) sa tailoring shop sa bahagi ng  Purok Bougainvilla, Barangay Don Andres sa bayan ng Ipil, Zamboanga, Sibugay, ayon sa opisyal kahapon.

Ayon kay P/Chief Inspector Ariel Huesca, spokesman ng Police Regional Office 9,  bandang alas-2:30 ng hapon nang salakayin ng pulisya ang Lorenz Tailoring Shoo na pagmamay-ari ng isang Romeo Aliyacyac.

Sinabi ni Huesca na nakatanggap ng impormasyon ang pulisya na nagpapatahi ng uniporme ang grupo ng MNLF rogue elements.

Narekober sa nasabing lugar ang mga uniporme ng militar na pinakabitan lamang ng patches ng MNLF.

Sa pahayag naman kay Aliyacyac, isang lalaki umano ang nagtungo sa kaniyang tailoring shop at ipinatahi ang mga camouflage uniform na pinakakabitan nito ng mga patches ng MNLF.

Patuloy namang inaalam ng mga awtoridad kung sino ang grupo na nagmamay-ari ng mga nakumpiskang uniporme.