17-anyos tinodas ng 14-anyos

BULACAN, Philippines – Bumabata ang kriminal sa kasalukuyang panahon makaraang mapatay sa saksak ang 17-anyos na estudyante ng kanyang kabarong 14-anyos na lalaki sa Barangay Libtong, Meycauayan City, Bulacan kamakalawa ng gabi. Napuruhan sa tiyan at idineklarang patay sa Montefalco General Hospital si Reynaldo Martinez ng Pinagpala Street sa nasabing barangay habang pinaghahanap naman ang suspek na itinago sa pangalang Tomtom. Sa imbestigasyon ni PO1 Gladys Neri ng Women’s and Children Complaint Desk , nagkasalubong ang dalawa pagsapit sa nasabing lugar kung saan nilait-lait ng suspek ang biktima. Upang hindi na humaba ang pagtatalo ay kusang lumayo ang biktima subalit sinundan ito ng suspek at inundayan ng saksak sa tiyan.