Pulis itinumba sa school

BATANGAS, Philippines – Maagang nagwakas ang serbisyo ng bagitong pulis matapos pagbabarilin at mapatay ng di-kilalang lalaki  na ikinasugat naman ng 8-anyos na mag-aaral sa  bayan ng Padre Garcia, Batangas kahapon ng umaga. Kinilala ni P/Senior Inspector Joel Ilagan, hepe ng Padre Garcia PNP ang napatay na si PO2 Dominic Bituin, naka-assign sa Provincial Special Operations Group (PSOG) ng Batangas Police Provincial Office (BPPO). Sugatan naman si John Rio Catibog y Bernadas, grade 3 pupil ng Padre Garcia Central School. Ayon sa ulat, naghatid lang ng anak si PO2 Bituin sa naturang paaralan nang lapitan at ratratin ng gunman na naka-gray bandang alas-6:40 ng umaga. Nadamay naman ang batang si Catibog nang tamaan ng ligaw na bala ng cal. 9mm pistol sa dibdib kung saan naisugod sa NL Villa Hospital sa Lipa City.