3 utas sa kidlat

MANILA, Philippines - Tatlo katao ang nasawi matapos na tamaan ng kidlat sa magkakahiwalay na insidente sa lalawigan ng Isabela at Pangasinan, ayon sa ulat kahapon.

Sa ulat ng Isabela Police, nasawi ang mga biktimang sina Jimboy Antonio, 19 at Rick Castillo, 13 ; kapwa farm helpers matapos na tamaan ng kidlat habang pinakakain ang kanilang mga alagang itik sa Brgy. Rizal, Santiago City, Isabela kahapon.

Nabatid na inabutan ng ulan ang mga biktima at ng biglang kumidlat ay nasapul ang mga ito  na kapwa dead-on-arrival sa pagamutan sa tinamong pagkasunog ng katawan.

Sa isa pang insidente, iniulat naman ni Chief Ins­pector Ryan Manongdo, Spokesman ng Pangasinan Police na patay rin ang isang 21 anyos na lalaki nang tamaan ng kidlat habang naliligo sa karagatan ng Lingayen, Pangasinan nitong Biyernes ng tanghali.

Ang biktima ay nakilala namang si Norman Bautista na isang bakasyunista at tubong Victoria, Tarlac na nagawa pang maisugod sa pagamutan pero nabigo ng maisalba. Raymund Catin­dig /Joy Cantos