Ex-convict dedo sa tandem

MANILA, Philippines - Napaslang ang 48-anyos na sinasabing ex-convict matapos itong pagbabarilin ng motorcycle-riding gunmen sa labas ng mall sa bayan ng Lapaz, Iloilo City kamakalawa ng hapon. Dalawang bala ng cal. 45 pistol ang tumapos sa buhay ni Dario Duran na dati ng nahatulan sa kasong homicide at theft. Sa ulat ni Iloilo PNP director P/Senior Supt. Gil Blando Lebin Jr. na nakarating sa Camp Crame, naganap ang krimen bandang alas-2 ng hapon kung saan naglalakad sa labas ng mall nang patraydor na pagbabarilin habang nakatalikod. Nakunan pa ng CCTV camera ng mall ang gunman habang tumatakas lulan ng motorsiklo matapos na bumulagta ang biktima.