Pulis pisak sa truck

BULACAN , Philippines - Nagwakas ang serbisyo-publiko ng 35-anyos na pulis matapos itong masawi dahil sa pagkakasalpok ng kanyang motorsiklo sa nakaparadang trailer truck sa gitna ng Quirino Highway sa Barangay tungkong Mangga, San Jose Del Monte City, Bulacan kamakalawa ng gabi.

Hindi na umabot ng buhay sa Ospital ng Lungsod ng San Jose Del Monte ang biktimang si P01 Rudy Daul, 35, nakatalaga sa patrol-Compac 6 sa San Jose Del Monte City PNP at nakatira sa Palmera Homes, Barangay Sto. Cristo.

Samantala, arestado naman ang drayber ng cement bulk trailer na si Victor Fernandez, 52, ng North Diamond Subd., Brgy. Maharlika sa nabanggit na lungsod.

Sa police report na nakarating kay P/Supt. Reniel Valones, papauwi na ang biktima matapos ang 12 oras na duty sa himpilan ng pulisya at pagsapit sa madilim na bahagi ng highway hindi nito napansin ang trailer truck na iligal na pumarada sa gitnang bahagi ng kalsada.

Dahil sa kawalan ng early warning device ay nasalpok ng motorsiklo ng biktima ang likurang bahagi ngn truck kung saan pumasok pa ang katawan ng pulis sa ilalim ng sasakyan.