Ambush: Pangulo ng asosasyon ng trike, dedo

BULACAN, Philippines - Napaslang ang 49-anyos na pangulong ng Tricycle Operators and Drivers Association (TODA) makaraang ratratin ng riding-in-tandem sa bahagi ng Barangay Pulong Bayabas sa bayan ng San Miguel, Bulacan kahapon ng umaga.

Idineklarang patay sa San Miguel District Hospital ang biktimang si Danilo De Los Santos ng Barangay Bulaong sa nasabing bayan.

Sa imbestigasyon ni PO1 Judesco Desiatco, nagmamaneho ng traysikel ang biktima kasama ang kanyang asawang si Helena at anak na si Daisy Delos Santos nang pagbabarilin ng motorcycle-riding assassins pagsapit sa nasabing barangay.

Nagtamo ng anim na tama ng bala sa iba’t ibang bahagi ng katawan ang biktima habang hindi naman sinaktan ang kanyang asawa at anak na nasaksihan ang pamamaril.

Narekober sa crime scene ang cal. 30 Carbine at dalawang magasine na pag-aari ng biktima habang patuloy naman ang imbestigasyon.