Lalaking ikakasal, ginilitan, pinutulan ng ari

MANILA, Philippines - Brutal na pinaslang ang 50-anyos na lalaking nakatakdang ikasal  sa 20-anyos na dalagang may diperensya sa pag-iisip matapos gilitan bago putulan ng ari sa Silay City, Negros Occidental, ayon sa opisyal kahapon.  

Sa phone interview, sinabi ni P/Supt. Rosauro Francisco, director ng Silay City PNP, nadiskubre ang krimen bandang alas-10 ng umaga noong Miyerkules sa Hacienda San Rafael Ramon, Brgy. Guimbalaoan.

Base sa imbestigasyon, si Teofilo Sakite ay ipinagkasundong ipakasal bukas (Aug. 18) matapos itong maaktuhang nakikipag-sex sa nasabing dalaga ng mga magulang mismo nito.

Noong Martes ng gabi habang pauwi na si Sakite kasama ang ama-amahang si Tenorio Sakite at Shirley Gallano na ina naman ng dalaga nang harangin ng magtiyuhing kamag-anak ng dalaga na sinasabing tutol sa kasalan.

Gayunman, pansaman­talang hindi muna tinukoy ni Francisco ang pagkakakilanlan ng mga suspek habang patuloy ang imbestigasyon.