NUEVA ECIJA, Philippines – Pinaniniwalaang pinatay sa sakal ang 82-anyos na lola bago pinagnakawan ng akyat-bahay sa Sitio San Pablo, Barangay Joson sa bayan ng Carranglan, Nueva Ecija noong Lunes ng gabi. Bandang alas-12 ng tanghali nang madiskubre ang bangkay ni Leonicia Obra na may palatandaang nanlaban bago tinodas sa sakal.
Nabatid na binisita ng anak na si Mercedes Cardenas ang kanyang ina na nag-iisang naninirahan sa kanilang bahay para kamustahin subalit patay na ito nang datnan.
Kaagad na humingi ng saklolo sa pulisya si Cardenas kung saan sinasabing pagnanakaw ang pangunahing motibo.
Nagawang makapasok ng akyat-bahay matapos wasakin ang pinto sa kusina ng bahay kung saan nilimas ang P3,700 at ilang dokumento na pag-aari ng biktima.