TUGUEGARAO CITY, Philippines - Nangisay bago namatay ang 60-anyos na lolo matapos itong hambalusin ng baseball bat sa ulo at leeg ng anak ng kanyang ka-live-in sa Barangay Poblacion South, Solano, Nueva Vizscaya kahapon.
Kinilala ni P/Chief Insp. Alberto Bagarra, hepe ng pulisya sa bayan ng Solano, ang biktima na si Vicente Guillermo habang sumuko naman ang suspek na si Asnawi Diongcat, 31, ng Barangay Bagahabag.
Unang inireklamo sa pulisya ang biktima ng kanyang ka-live-in dahil sa pambubugbog.
Ang reklamo ng misis ay umabot sa kaalaman ng anak nitong si Asnawi Diongcat, 31, ng Barangay Bagahabag kung saan nangakong ipaghihiganti ang kanyang ina.
Natiyempuhan ng suspek ang biktima sa barbekyuhan sa plaza at walang sabi-sabing sinapak.
Habang hilo ang biktima, sinundan pa ng suspek ng sunud-sunod na hataw ng baseball bat sa ulo hanggang sa lumagapak ito sa lupa.
Bilang pagtatapos, hinataw pa ng suspek ang leeg ng matanda kaya natuluyan.