MANILA, Philippines - Palaisipan ang pagkamatay ng dalawa-katao kabilang ang dating pulis na natagpuan sa loob ng inabandonang kotse sa Biñan, Laguna kahapon ng madaling araw.
Kinilala ang isa sa mga napaslang na si ex-PO1 Arturo Avellano Jr., nadismis na miyembro ng Calamba City PNP at patuloy namang inaalam ang pagkakakilanlan ng isa pa.
Sa ulat ni P/Supt Leonard Luna na isinumite sa Camp Crame, bandang alauna y medya ng madaling araw nang madiskubre ang krimen sa Purok VI, Barangay Sto. Tomas sa nasabing bayan.
Lumilitaw na napansin ng ilang residente ang nakabalagbag na sasakyan ni Avellano sa kanilang lugar.
Inusisa naman ng mga residente ang loob ng sasakyan kung saan tumambad ang duguang bangkay ng dalawa na hindi pa alam kung tama ng bala ng baril o kaya’y saksak.
Ayon sa pulisya, huling namataang buhay si Avellano habang nagpapagawa ng sasakyan sa Calamba City kamakalawa ng gabi.