3 sugatan sa hospital blast

MANILA, Philippines - Niyanig ng malakas na pagsabog ang isa sa mga silid ng Notre Dame Hospital na ikinasugat ng tatlo katao sa Cotabato City bago maghatinggabi kamakalawa.

Kinilala ang mga nasugatan na sina Emilio Tayrus, 24, security guard sa hospital; Nobaisa Pangalian, at kapatid nitong si Baisa Pangalian, kapwa 18-anyos.

Ayon kay Cotabato City PNP Director P/Senior Supt. Danny Reyes, dakong alas-11:50 ng gabi ng maganap ang pagsabog sa Room 227 na kinaroroonan  ng pas­yenteng si Badrudin Saludsong na sinasabing may warrant of arrest kaugnay ng pagpatay sa isang pulitiko sa bayan ng Barira, Maguindanao.

Bago ito ay tinawag ni Esmael Usop ang mga nurse at sinabing hindi makahinga si Saludsong at nang malapit na ang nurse sa pinto ay sumigaw ito na may granada sa pintuan ng kaniyang silid.

Kaagad na sumabog ang granada kung saan ikinasugat ng guwardiya at ng dalawang iba pa na bantay sa nasabing silid.

Inaresto naman ng mga awtoridad si Usop kaugnay ng posibleng kinalaman nito sa insidente.