Duwelo sa basketball: 2 bulagta, 1 kritikal
MANILA, Philippines - Dalawa-katao kabilang ang isang pulis ang iniulat na nasawi habang nasa kritikal namang kalagayan ang bodyguard ni Presidential Legislative Affairs Adviser Manuel Mamba matapos ang madugong duelo sa bayan ng Tuao, Cagayan kamakalawa ng gabi.
Kinilala ni P/Senior Supt. Mao Aplasca, director ng Cagayan provincial police office, ang nasawing pulis na si SPO1 Osmundo Taguinod at Carlos Baddal.
Samantala, malubha naman ang bodyguard ni Mamba na si Andres Castillo na sinasabing nakabarilan ni Baddal.
Si Castillo ay sinasabing driver/bodyguard ni ex- Cagayan 3rd District Congressman at ngayo’y Presidential Legislative Affairs Adviser Manuel Mamba.
Ayon kay P/Senior Inspector Elias Tanguilan, dakong alas-10:45 ng gabi nang rumesponde si SPO1 Taguinod matapos na makatanggap ng impormasyon na nagkakagulo sa tapat ng gymnasium kung saan ginaganap ang paliga sa basketball sa Naruangan East sa nasabing bayan.
Nabatid na tinangkang awatin ni SPO1 Taguinod ang dalawa na kapwa bumunot ng baril pero nagbarilan pa rin kaya tinamaan sa dibdib ang pulis.
Inaalam na ng pulisya kung kaninong baril ang balang tumama kay SPO1 Taguinod gayundin ang pinag-ugatan ng duelo.
- Latest
- Trending
