Dalagita dinukot, ni-rape

MANILA, Philippines - Masaklap ang sinapit na kapalaran ng isang 12 anyos na dalagita matapos itong dukutin ay halayin pa ng hindi nakilalang lalaki na humarang sa bata na galing sa pagbili ng pandesal sa panaderya sa Brgy. Guadalupe, Cebu City kamakalawa.

Ang biktimang itinago sa pangalang Giselle ay tulala , punit-punit ang damit at halos hirap lumakad ng matagpuan ng mga nagpapatrulyang barangay tanod habang naglalakad sa New Imus Road ng nasabing lugar dakong alas-6 ng umaga.

Sa ulat ng Cebu City Police, dakong alas-5 ng umaga habang pauwi na ang biktima sa kanilang tahanan di kalayuan sa panaderya na binilhan nito ng pandesal nang harangin umano ng hindi nakilalang lalaki at puwersahang isinakay sa motorsiklo.

Base sa salaysay ng biktima sa mga imbestigador ng Women and Childrens Desk ng Cebu City Police, dinala umano siya ng nasabing lalaki sa isang abandonadong bahay sa Brgy. Mabolo at doon hinalay.

Nagawa namang makatakas ng bata matapos na malingat ang suspek at naglakad sa kalsada hanggang makarating sa New Imus Road sa Brgy. Padilla kung saan ito natagpuan ng mga barangay tanod.

Isinailalim na sa medical examination ng Vicente Sotto Memorial Medical Center ang biktima at patuloy rin ang imbestigasyon sa kaso.