3 mag-uutol nilamon ng apoy

MANILA, Philippines - Kalunus-lunos na ka­ma­tayan ang sinapit ng tatlong magkakapatid na bata habang dalawang iba pa ang grabeng nasugatan matapos makulong sa loob ng bahay sa liblib na bahagi ng Barangay Taloy Sur sa bayan ng Tuba, Benguet noong Sabado ng gabi.

Sa ulat ng National Disaster Risk Reduction and Management Council, halos hindi na makilala sa pagkasunog ang mga bangkay nina Jedric Agnawa, 5; Jayvi Agnawa, 4; at si Zowie Agnawa, 1, pawang nakatira sa Sitio Caucalan sa nabanggit na barangay.

Ginagamot naman sa Baguio City General Hospital and Medical Center ang mga nasugatang sina Marimar Agnawa, 1; at Jayver Agnawa, 7-buwang gulang na sanggol.

Sa naantalang ulat na nakarating sa NDRRMC, naitala ang insidente dakong alas-7:45 ng gabi sa nasabing barangay may dalawang araw na ang nakalipas.

Lumilitaw sa imbestigasyon na pansamantalang iniwan ng kanilang mga magulang ang magkaka­patid matapos na makatulog dahil nagtungo ang mga ito sa kanilang kapitbahay.

Gayon pa man, natumba ang kandila na ilaw sa nasabing bahay kung saan nadikit sa kurtina at ilang plastic na lumikha ng apoy na kuma­lat sa buong kabahayan.