2 guro kinidnap

MANILA, Philippines - Dalawang guro ang iniulat na kinidnap ng mga armadong kalalakihan sa kahabaan ng highway sa Sitio Limonsudan, Barangay Rogongon sa Iligan City noong Lunes ng hapon. Kinilala ni Col. Daniel Lucero, commander ng Army’s 103rd Infantry Brigade at ng Task Force Makalindad ang dalawang binihag na sina Rene Somadang at Tino Sanchez na kapwa guro sa Limonsudan Elementary School. Samantala, nagawa namang makatakas ng apat pang gurong kasamahan ng dalawa sa nasabing insidente. Sa imbestigasyon ng pulisya, lumilitaw na magkakaangkas sa tatlong motorsiklo ang mga biktima nang paputukan ng mga armadong kalalakihan. Matapos harangin ang mga biktima ay kinaladkad at tinangay patungo sa hindi pa malamang destinasyon habang patuloy naman ang search and rescue operation.