CAMARINES NORTE, Philippines — Kamatayan ang sumalubong sa isang 42 anyos na lalaki na tinakbuhan ang bill sa videoke bar makaraang aksidenteng makuryente sa isang live wire na pamatay sa mga pesteng daga sa palayan sa Nabua, Camarines Sur kamakalawa ng gabi. Idineklarang dead-on-arrival sa Rinconada Medical Center ang biktimang si Gary Altera may asawa at residente ng Brgy. Lourdes ng nasabing bayan. Nabatid na bago ang insidente ay uminom ng alak at umorder ng pulutan na umabot sa halagang P2,000 ang biktima. Ayon sa pulisya P700.00 lamang ang perang dala ng biktima kaya’t ng makakuha ng tiyempo ay nagtatakbo pero nakita ito ng waiter at hinabol. Sa takot na mahuli at makulong ay tumalon sa palayan ang biktima na hindi akalain na may patibong na live wire sa mga pesteng daga kaya’t mabilis na gumapang sa katawan nito ang malakas na boltahe ng kuryente.