Magsyotang ikakasal pinabulagta

SOLANO, Nueva Vizcaya, Philippines  – Hindi na makapagha-honeymoon ang ikakasal na magsyota makaraang pagbabarilin hanggang sa mapatay ng mga ’di-kilalang kalalakihan sa bayan ng Dingras, Ilocos Norte, kahapon.

Naligo sa sariling dugo dahil sa mga tama ng bala ang magkasintahang sina Denver Edica ng Labut, Badoc, Ilocos Norte at Apple Sacramento ng Barangay Elizabeth, Dingras sa nasabing lalawigan.

Nabatid na papauwi na sana ang dalawa na lulan ng motorsiklo para pag­handaan ang kanilang kasal sa Enero 2012 nang harangin at ratratin sa bahagi ng Barangay Barong Barong sa nasa­bing bayan.

Napag-alamang nag­desisyong magpakasal ang magkasintahan na sinasa­bing may isang taon nang nagsasama para ipormal ang pagsasama subalit masyadong napaaga ang salubong ni kamatayan.

Malaki ang paniniwala ng pulisya na matinding selos ang isa sa motibo ng suspek para paslangin ang dalawa habang patuloy naman ang imbestigasyon.