NUEVA ECIJA, Philippines — Dalawang kalalakihan na sinasabing miyembro ng gun-for-hire gang ang napatay matapos na makipagbarilan sa pulisya sa bahagi ng Muñoz-Lupao Road sa Barangay Rizal, Science City of Muñoz, Nueva Ecija kamakalawa.
Kinilala ang mga napaslang base sa nakuhang identification card na sina John Parica, lider ng gang at Ruben Baldovino.
Sa ulat na nakarating kay P/Supt. Pedro Soliba, director ng Science City of Muñoz PNP, bandang alas-11:30 ng tanghali nang mamataang papalapit sa checkpoint ang dalawang motorsiklo na lulan ang mga suspek.
Sa halip na huminto sa checkpoint ay pinaputukan ng apat na suspek na magkakaangkas sa dalawang motorsiklo ang pulisya kaya nauwi sa shootout habang nakatakas naman ang dalawa.
Narekober sa dalawang napatay ang plano na itutumba ang barangay chairman sa piyestahan kaya inilatag ang operasyon. Joy Cantos at Christian Ryan Sta. Ana