Lolo pinagtataga, inilibing

MANILA, Philippines - Humihinga pa nang ilibing  na halos ulo na lamang ang nakalitaw sa mababaw na hukay ang isang 65-anyos na lolo matapos itong pagtatagain ng kaniyang kainuman sa liblib na lugar sa Barangay Talisoy sa bayan ng Jomalig, Quezon noong Lunes ng umaga. Kasalukuyang nasa kritikal na kondisyon sa ospital ang biktimang si Arnulfo Belda habang pinaghahanap naman ang suspek na si Gerry Litong. Lumilitaw sa imbestigasyon na noong Oktubre 30 ng gabi ay nakipag-inuman ang biktima kay Litong at isang Aye del Castillo pero naunang umuwi ang huli bandang alas-9 ng gabi. Nang maiwan ang biktima at suspek ay nagwala ito saka pinagtataga ang matanda na hindi pa nakuntento ay naghukay pa sa buhanginan at inilibing ang biktima pero dahil sa pagmamadali ay hindi natabunan ang parte ng ulo. Kaagad naman rumesponde ang pulisya matapos makatanggap ng impormasyon kaugnay sa insidente.