NUEVA ECIJA, Philippines – Kamatayan ang sumalubong sa isang barangay chairman habang nasa kritkal naman na kalagayan ang dalawang iba pa matapos malason sa kinaing sardinas noong Sabado ng umaga sa Cabanatuan City, Nueva Ecija. Namatay habang ginagamot sa Immaculate Conception Medical Center si Chairman Rolando “Loleng” Garcia, 58, ng Barangay Imelda habang inoobserbahan naman ang barangay secretary na si May at isang alyas Garry, traysikel drayber. Nabatid sa ulat na bago maganap ang insidente ay namahagi ng relief goods si Chairman Garcia sa kanyang mga kababayang sinalanta ng bagyong Pedring kung saan nananghalian ng ginisang sardinas na may bunga ng papaya. Makalipas ang ilang oras ay nanakit ang tiyan at nagsusuka ng mga biktima kaya isinugod sa nasabing ospital kung saan nasawi ang opisyal ng barangay.