CAVITE, Philippines —Dalawa katao ang kumpirmadong nasawi matapos na mauwi sa pamamaril ang iringan sa dance floor sa isang club sa Brgy. Burol Main, Dasmariñas City kahapon ng madaling araw. Kinilala ang mga biktima na sina Jose Marie Silvano, 40 anyos at Sarry Jeam Caberto, 23; pawang ng Brgy. Salitran 3 ng lungsod na ito. Sa imbestigasyon ni PO3 Michael Santos, may hawak ng kaso dakong alas- 2:06 ng madaling-araw ng maganap ang insidente sa Dzone Club sa nasabing lugar. Ayon sa imbestigasyon, nagkaroon ng iringan ang grupo ng mga biktima at ng hindi nakilalang mga kalalakihan na nauwi sa pamamaril ng mga suspek. Mabilis namang tumakas ang mga suspek lulan ng tatlo hanggang apat na motorsiklo. Nagsasagawa na ng follow-up operation ang mga awtoridad sa kasong ito.