Hapones natagpuang patay

MANILA, Philippines - Palaisipan sa mga awtoridad kung nag-suicide o sadyang pinaslang ang isang 76-anyos na Japanese pensioner matapos matagpuang may sugat sa noo at nakabigti ng electrical cord sa inuupahang bahay sa Barangay Agus, Lapu-Lapu City noong Martes.

Sa ulat ni Lapu-Lapu City PNP director P/Senior Supt. Anthony Obenza, kinilala ang biktima na si Takao Ukena, biyudo mula sa Osaka, Japan at pansamantalang nangungupahan sa KB Homes Subdivision.

Nadiskubre ng mag-asawang tagalinis na sina Marilie Paracueles, 25; at Rolly, 28, ang bangkay ng dayuhan na sinasabing huling namataang buhay noong Lunes ng gabi na nanonood ng telebisyon.

Ang nasabing biktima ay nag-iisa lamang sa tahanan nito at nagtutungo lamang ang mag-asawa sa nasa­bing bahay tuwing umaga para maglinis.

Nabatid na wala namang nawawalang anumang gamit at walang palatandaang pinuwer­sang buksan ang pintuan sa tahanan ng Hapones kaya may posibilidad rin na kakilala nito ang killer.