MANILA, Philippines - Umaalingasaw na ang masangsang na amoy nang matagpuan ang nagsisimulang maagnas na bangkay ng 59-anyos na tiyuhin ni Justice Secretary Leila de Lima sa Barangay Agustin sa Iriga City, Camarines Sur noong Lunes.
Sa police report na nakarating kahapon sa Camp Crame, ikinabalisa ng mga kapitbahay ni Francisco de Lima ang ilang araw na pananahimik nito at hindi paglabas ng bahay.
Pumukaw din sa atensyon ng mga residente ang mabahong amoy na nagmumula sa tahanan ni de Lima.?
Dito nagpasya ang mga residente na ipagbigay-alam sa awtoridad ang amoy at pagkawala ng matanda na napag-aalamang mag-isang namumuhay.??
Sa pagpasok sa tahanan, nadiskubre ang bangkay ni Francisco na pinaniniwalaang ilang araw nang patay.
Sinasabing dumaranas ng sakit na diabetes ang biktima na huling namataang buhay noong Hunyo 12.??
Sa imbestigasyon ng Iriga City PNP, wala namang nakitang foul play sa pagkamatay ni de Lima.