Guro, 1 pa tiklo sa buy-bust

KIDAPAWAN CITY, Philippines – Rehas na bakal ang binagsakan ng isang guro at kasama nito matapos maaresto ng pulisya sa inilatag na buy-bust operation sa Talisay Street sa Kidapawan City, North Cotabato kahapon ng umaga. Pormal na kinasuhan ang mga suspek na sina Jeshram Descalzo Ballos, 32, guro sa Carmen National High School at Merly Dacampo Casi, 40, ng nabanggit na lungsod. Base sa police report, naaktuhan nina P/Supt. Chino Mamburam, hepe ng Kidapawan City PNP, at intelligence division chief na si P/Insp. Rolando Dillera, ang dalawa na nagbebenta ng bawal na droga. Nasamsam sa mga suspek ang ilang gramo ng shabu at marked money na ginamit sa drug bust. Nabatid na isinailalim sa surveillance operation ang dalawa bago inilatag ang buy-bust operation.