BATANGAS, Philippines — Masaklap na kamatayan ang inabot ng 5-anyos na batang babae matapos aksidenteng mabaril ng sarili nitong 10-anyos na utol sa Lipa City, Batangas kamakalawa ng hapon.
Kinilala ni P/Senior Supt. Rosauro Acio, Batangas police director ang napatay na si Realyn Mancilla ng Purok 2, Brgy. Pangao sa nabanggit na lungsod.
Ayon sa report, naglalaro ng baril-barilan sina Mancilla at ang kanyang kapatid na itinago sa pangalang Anna nang maganap ang aksidente bandang alas-2 ng hapon.
Lumilitaw sa imbestigasyon na kinuha ni Anna ang shotgun ng kanyang ama na nakatago sa ilalim ng kama kung saan itinutok sa kanyang kapatid na si Mancilla.
Sa hindi inaasahang pagkakataon ay nakalabit nito ang gatilyo kung saan tinamaan sa ulo ang biktima.
Kaagad naman tinungo ng ama ang pinagmulan ng putok ng kanyang shotgun at bumulaga ang kanyang anak na duguang nakabulagta sa kama habang nakatulala at umiiyak naman si Anna sa nagawa.
Ayon sa pulisya, walang kaukulang papeles ang Winchester 12-gauge shotgun na pinaniniwalaang pananagutan ng ama ang naganap na insidente.
Kasalukuyang dinala sa lokal na sangay ng Department of Social Welfare and Development ang batang si Anna.