MANILA, Philippines - Isa na namang minero ang iniulat na nasawi matapos itong makalanghap ng nakalalasong gas sa tunnel ng minahan sa Upper Acupan, Barangay Virac sa bayan ng Itogon, Benguet kamakalawa. Kinilala ang nasawi na si Rocky Mendoza, 19, tubong Bakun, Benguet at nakatira sa bayan ng Itogon. Batay sa police report, dakong alas- 3:45 ng hapon nang pumasok sa minahan ng ginto na pag-aari ni Teodoro Camiling ang biktima. Sinasabing nanikip ang paghinga ng biktima at nakaranas ng matinding pagkahilo matapos na malanghap ang nakalalasong gas sa minahan. Nabatid na humiwalay ang biktima sa kaniyang mga kasamahang minero na sina Rener Pengi, Jerson Mendoza at John Saliwan. Nagawa pang maisugod sa Baguio City General Hospital ang biktima pero nabigo na itong maisalba. Patuloy naman ang imbestigasyon ng mga awtoridad.