Bank teller nagbigti

MANILA, Philippines - Isang bank teller na aburido dahil sa hindi maipaliwanag na pagkawala ng P300,000 ang nagbigti sa ilalim ng punong manga sa Argao, Cebu, ayon sa ulat na nakarating sa Camp Crame.

Kinilala ang biktima na si Ivy Cope Montañez, 29- anyos at empleyado ng Rural Bank of Cebu South sa Carcar City.

Natagpuan ito ng  magsasakang si Boy Tenerio na nakabigti ng lubid sa puno ng mangga sa labas ng kanilang bahay sa Brgy. Colawin sa munisipalidad ng Argao mag-alas-7 ng umaga.

Nabatid na kasalukuyang tutungo sa bukid si Tenerio nang magulantang ito ng makitang nakabigti ng lubid sa ilalim ng punong mangga si Montañez.

Sa suicide note na natagpuan sa kanyang silid, humingi si Montañez ng paumanhin at ipinarating ang pagmamahal sa kanyang pamilya at sinabing ang kamatayan ay pagsisimula ng bagong buhay.

Hindi sinabi ni Montañez sa kanyang sulat ang dahilan ng pagpapakamatay subalit hiniling na ilagay siya sa puting kabaong at ilibing sa Mayo 22.

Patuloy ang imbestigasyon ng pulisya sa kasong ito kung saan isa sa mga sinisilip na anggulo ay ang hindi maipaliwanag na pagkawala ng naturang halaga sa bangko na ipinagkatiwala kay Montañez ang isa sa hinihinalang sanhi ng insidente.