Newly grad todas sa hazing

BULAKAN, Bulacan , Philippines — Maagang nagwakas ang buhay ng isang binata matapos na mamatay ito sa isinagawang hazing ng isang fraternity na naganap sa isang lugar dito kahapon.

Patay na nang idating sa Bulacan Provincial Hospital sa Malolos City ang biktimang si Roneal De Guz­man 22, graduate ng Computer Technology.

Nakadetine naman ang mga suspek na sina John Lawrence Borja 18 at Marlon Mendoza 19, kapwa residente ng Brgy. Sta. Monica sa bayan ng Hagonoy na naaresto matapos ang follow up operation.

Kasalukuyan pang pi­nag­hahanap ang tatlo pang miyembro ng fraternity na may mga alyas na Lelouch, Kudo residente din ng naturang lugar at Mandirigma na nakatira sa Crossing, Malolos City pawang mga miyembro ng Tau Gamma Phi.

Base sa imbestigasyon, dakong alas -11:00 ng uma­ga naganap ang initiation rites sa biktima sa isang lugar sa Brgy. Pitpitan, Bulakan at matapos ang ilang oras ay nakaramdam na ito ng paninikip ng kanyang dibdib saka agad na isinugod sa ospital ng limang suspek ngunit ng malamang patay na ito ay agad ding tumakas ang mga ito.

Nagtamo ng mga pasa sa magkabilang hita bunsod ng matinding palo ng isang kahoy at 'di mabilang na pasa sa iba’t ibang bahagi ng katawan ang biktima na pinaniniwalaang naging sanhi ng kanyang kamatayan.