KIDAPAWAN CITY , Philippines – Ilang oras matapos maganap ang salpukan ng motorsiklo at kotse, isa na namang sakuna ang naganap kung saan sumalpok ang pampasaherong van sa kasalubong na trak sa highway ng Barangay Tibao sa bayan ng M’Lang kahapon ng umaga.
Kaagad na nasawi si Nenita Villanueva ng Tacurong City, habang sugatan naman ang 16 iba pa na pasahero ng Mitsubishi L300 van.
Ayon kay P/Supt. Reinante delos Santos, hepe ng M’lang PNP, binabaybay ng L300 van ni Salik Baod ng Datu Paglas, Maguindanao ang highway nang biglang sumulpot ang Fuzo truck (GKU 342).
May ilang ulit na bumaliktad ang van kung saan nasa kritikal na kalagayan ang drayber na naisugod sa M’lang Doctors Hospital.
Nasa custody ngayon ng M’lang PNP ang driver ng truck na si Romulo Perez Dulana ng Valencia City, Bukidnon.