BULACAN, Philippines – Kalaboso ang binagsakan ng isang 31-anyos na mister makaraang gulpihin at buhusan ng kumukulong tubig ang kanyang misis sa loob ng kanilang bahay sa Barangay San Pedro Highway sa bayan ng Bustos, Bulacan kahapon ng madaling-araw. Luhaang dumulog sa pulisya si Shiela Gallo, 30, para ireklamo ang kanyang mister na si Russel Gallo. Ayon kay P/Chief Insp. Isagani Enriquez, lumilitaw na lango sa alak ang suspek nang umuwi kung saan pasigaw na tinawag ang kanyang misis na natutulog. Nang hindi magising ang biktima ay sinapak sa mukha at binato ng telebisyon. Hindi pa nakuntento ay binuhusan pa ng mainit na tubig ang biktima kung saan naawat lamang ng ilang barangay tanod.