Guro tiklo sa pagnanakaw

BULACAN, Philippines  — Naharap sa kasong pagnanakaw ang isang 31-anyos na guro makaraang maaktuhang ng civilian guard na nagnanakaw ng paninda sa shopping mall sa bayan ng Marilao, Bulacan kamakalawa ng hapon. Pormal na kinasuhan ng pulisya ang suspek na si Nora Chang-Santos ng Metrogate Complex sa Barangay Lambakin. Sa imbestigasyon ni PO3 Ricardo Salomon, pumasok ang suspek sa Watson’s Personal Care na nasa kilalang mall sa Barangay Ibayo kung saan agad na isinilid sa loob ng kanyang shoulder bag ang iba’t ibang mga uri ng pampaganda. Lingid sa kaalaman ng suspek ay namataan na siya sa CCTV camera kung saan paglabas ng tindahan ay kaagad siya sinita at narekober ang mga paninda na nagkakahalaga ng P2,200.