Mag-ama kinatay, 1 pa kritikal

MANILA, Philippines –  Malagim ang sinapit na kamatayan ng isang mag-ama habang isa pa ang nasa kritikal na kondisyon matapos na tadtarin ng taga ng dalawang  lalaki  na ­puwersahang pumasok sa tahanan ng mga ito sa Brgy. Caburan Small, Jose Abad Santos, Davao del Sur kamakalawa.

Halos humiwalay ang ulo at tadtad rin ng taga sa katawan ang mag-amang sina Berto Simba, 50-anyos at anak nitong si Dandan, 16 anyos; pawang dead-on- arrival sa Tomas Lachica District Hospital.

Nasa kritikal namang kondisyon ang isa pa sa anak ni Berto na si Jay-ar, 15-anyos na inilipat sa Southern Mindanao Medical Center, Davao City bunga ng maselan nitong kondisyon.

Sa ulat ng Police Regional Office (PRO) 11, bandang alas -3 ng mada­ling araw habang mahim­bing na natutulog ang mag-ama ng puwersahang pasukin ng mga suspek na natukoy na ang magkapatid na sina Gonzales Matanod at Koto Matanod; pawang residente ng Sitio Kikog ng nasabing munisipalidad.

 Agad na pinagtataga ng mga suspek ang nasorpresang mag-ama na nabigong ipagtanggol ang kanilang mga sarili. Ang mga suspek ay matagal na umanong kaaway na mortal ng pamilya ng mga biktima.

 Ang mga suspek ay natukoy base sa testimonya ng mga kapitbahay ng mga biktima na nakitang tumatalilis sa tahanan ng pamilya bitbit ang duguan pang mga bagong hasang itak na ginamit sa krimen. Nagsasagawa na ngayon ng hot pursuit operations ang mga awtoridad laban sa mga suspek upang pa­nagutin ang mga ito sa batas.