MANILA, Philippines – Napatay ang isang 31-anyos na mister matapos nitong ipagtanggol ang pinsang dalaga laban sa senglot na nobyong pulis sa gitna ng mainitang pagtatalo ng magkasintahan sa Barangay San Franciso Sur sa bayan ng Sudipen, La Union noong Biyernes ng gabi.
Sa text message, kinilala ni P/Senior Supt. Ramon Purugganan ang nasawi na si Ariel Jubahib habang tugis naman ng pulisya ang suspek na si PO2 Antonio Bautista Jr., 51, may asawa, nakatalaga sa Sudipen PNP at nakatira sa Brgy. Magsiping sa bayan ng Luna.
Lumilitaw na sumugod ang senglot na si Bautista sa tahanan ni Cristeta Doliente at hinahanap ang syota nitong si Mhardie Buquing, 19.
Kinompronta ni Bautista ang kasintahan bago tinutukan ng baril kung saan pilit na inawat ng biktima.
Bunga nito, nagalit at pinagbabaril ng suspek ang biktima saka tumakas sa crime scene.