MANILA, Philippines - Isang big-time drug dealer ang naaresto at nakumpiskahan ng apat na sako ng marijuana bricks na nagkakahalaga ng mahigit sa P4.9-M sa isinagawang buy-bust operations sa Brgy. Poblacion, Kibungan, Benguet nitong Martes ng madaling araw.
Kinilala ang nasakoteng suspek na si John Pawas, 46-anyos, residente ng nasabing lugar.
Ayon sa ulat, sinalakay ng mga elemento ng Regional Anti-Illegal Drug Special Operation Task Group (RAIDSOTG) ang bahay ng suspek dakong alas-2:05 ng madaling-araw kung saan nahuli ang nasabing mga marijuana.
Hindi na nakapalag ang suspek matapos makumpiskahan ng apat na sako ng marijuana na tumitimbang ng 90 kilo na nagkakahalaga ng P4.9-M.