Killer truck: 1 dedo, 7 sugatan
OLONGAPO CITY, Philippines – Isa ang patay habang pitong iba pa ang nasugatan makaraang araruhin ng dump truck na sinasabing nawalan ng preno ang limang sasakyan kahapon sa kahabaan ng highway ng Barangay Kalakhan, Olongapo City.
Sa ulat ni PO3 Rene Pundavela ng Traffic Enforcement and Patrol Unit, si Jay-Ar Luciano ng Old Cabalan ay nasawi matapos na masalpok ang sinasakyang traysikel na kabilang sa limang sasakyan.
Naisugod naman sa James Gordon Hospital sina Richard Bris, 23; Jovelyn Japona, 16, ng N. Cabalan; Mart Alba, 36, ng Bagong Barrio, Caloocan City; Gilson Asencio, 25, ng Talisay St., G. Heights; Joel Paule Pineda, 36, Coral St., G. Heights; Ruel Lubang, 44, Upper Kalaklan; at si Edwin Ebrole, 45, Upper G. Heights, Olongapo City.
Lumilitaw na patungong city proper ang trak (XP929) ni Ricky Dacayo ng Brgy. San Rafael, San Marcelino nang mawalan ng preno kaya inararo ang limang sasakyan kabilang na ang traysikel na sinasakyan ni Luciano.
Pormal naman kakasuhan ang drayber na ngayon ay nakakulong. Alex Galang at Randy Datu
- Latest
- Trending
