MANILA, Philippines - Nalansag ng mga operatiba ng pulisya ang notoryus na Gapos Gang na responsable sa serye ng robbery/hold-up sa Laguna matapos masakote ang apat na miyembro ng grupo sa isinagawang operasyon sa Brgy. Abo, Nagcarlan, Laguna noong Lunes ng gabi.
Kabilang sa mga suspek na sumasailalim sa tactical interrogation ay sina Dave Ragas, 27; at Rommel Calma, 31, pedicab driver na kapwa residente ng Sta. Cruz, Laguna; Richard Pasamba, 28; at si Adan Ocampo, 29.
Positibo namang kinilala ni ex-Chairman Ricardo Ortega ng Brgy. Balimbing, Nagcarlan ang mga suspek na nanloob sa kanyang tahanan noong Oktubre 7, 2010.
Sa ulat ni P/Senior Supt. Gilbert Cruz, maging ang tahanan ng mag-asawang Eladio Doria, Librada at apat na anak ay nagawang looban ng mga suspek.
Nasamsam sa mga suspek ang apat na baril, granada patalim, mga bala, celpone, mga alahas, P1,670 cash at pulang motorsiklo.