BAYOMBONG, Nueva Vizcaya, Philippines – Kinasuhan na ng pulisya ang anim na suspek sa pagkidnap at brutal na pagpatay sa mag-asawang Tsinoy trader at isa pang business partner sa bayan ng Alicia, Isabela.
Ayon sa pulisya, ang mga suspek ay itinuturong resonsable sa brutal na pagpatay sa mag-asawang sina Lucio Pua, 42; Rosemarie Pua, 40; at ang kanilang business partner na si Gemma Eugenio.
Kabilang sa pinakahuling sumukong suspek kamakalawa ay sina Arvin Guirao, 42, negosyante; at Robert Baccay, 38, kawani sa munisipyo ng Echague, Isabela.
Base sa record ng pulisya, ang mga biktima ay nagtungo sa Barangay Ipil, sa bayan ng Echague, Isabela upang kunin ang P1.3 milyong kabayaran ng kanilang negosyong palay kay Jaylord Dimal.
Nabatid na sumuko sa pulisya ang isa sa anim na suspek na si Eduardo Sapipi at umamin sa kanyang partisipasyon matapos usigin ng kanyang konsensiya sa ginawang krimen.
Sina Dimal; Sapipi; Allan Castillo alias Gerald at isang Ernesto Villador na naunang sumuko ay naunang kinasuhan.