Mag-asawang trader nilikida
KIDAPAWAN CITY, Philippines – Napaslang ang mag-asawang negosyante makaraang ratratin ng mga ‘di-pa kilalang lalaki na lulan ng tatlong motorsiklo sa bahagi ng Sinsuat Avenue sa Cotabato City, Maguindanao kahapon ng umaga.
Dalawang tama sa ulo ang tumapos sa buhay ni Nonie Luminog Laguiab habang sa dibdib naman ang tama ni Sarah “Bailyn” Mamalangcas-Laguiab, kapwa 35-anyos at residente ng Sitio Kalantungan, Poblacion-8 sa Cotabato City.
Ayon sa report ng Cotabato City PNP, lulan ng Toyota Revo (XCC691) ang mag-asawa kung saan inihatid ang apat na anak sa Norte Dame Religious Virgin Mary of Cotabato bandang alas-6:30 ng umaga.
Ilang metro pa lamang nakalalayo ang mag-asawa sa nabanggit na eskuwelahan ay hinarang at niratrat ng motorcycle-riding gunmen.
Matapos masiguro na patay na ang mag-asawa ay kaagad na tumakas ang gunmen patungo sa direksyon ng Bormaheco Drive palabas ng Norte Dame Avenue.
Isa sa apat na anak ng mag-asawang Luminog ay nasa hayskul, dalawa sa elementarya, at isa naman sa kindergarten na pawang mag-aaral sa nabanggit na school.
Samantala, ilang oras matapos paslangin ang mag-asawang Luminog pinagbabaril din hanggang sa mapatay ang negosyanteng si Monaim Dilaminan ng East Patadon, Kidapawan City.
- Latest
- Trending
