LUCENA CITY, Philippines —Makalipas ang halos 24 oras na hot pursuit operation, nadakip na ng mga elemento ng Lucena Police ang pangunahing suspek na pumaslang sa isang wheelchair ridden na Tsinoy at kanyang misis.
Si Joel Hanabahab, 23, ay naaresto ng Task Force Lo na pinamumunuan ni P/S INSP. Fernando Reyes III sa sitio Tala, San Andres,Quezon. Narekober sa kanyang pag-iingat ang cash na 21,000 na hinihinalang bahagi ng malaking halaga na kinulimbat nito sa kanyang mga among sina Roberto Ong y Lo at Nenita Bolanos.
Magugunitang noong Huwebes ng gabi ay natagpuan ni Nestor Ong ang kanyang kapatid na si Roberto at misis nito na kapwa walang buhay sa kanilang bahay.
Malaki ang paniniwala nito na ang suspek na bagong kakukuha lamang nila bilang boy-helper ang gumawa ng karumal-dumal na krimen sa kanyang kapatid at hipag at pagkatapos ay pinagnakawan pa. Sa interogasyon ay inamin ng suspek na siya ang gumawa ng pamamaslang sa kanyang mga amo at sinabing may kasama pa siyang isa, gayunman ay hindi nito tinukoy ang pangalan.