CAMP SIMEON OLA, Legazpi City, Philippines —Isang barangay chairman na pangulo ng (Association of Barangay Chairmen) sa bayan ng Del Gallego, Camarines Sur ang nasawi habang nakaligtas naman ang kasama nitong barangay chairman din matapos silang tambangan ng mga ‘di-nakikilalang mga armadong suspek sa kahabaan ng Maharlika Highway sa Barangay Bagacay, Libmanan, Ca marines Sur.
Nakilala ang biktima na si Danilo Buendia, may asawa at ABC President ng bayan ng Del Gallego habang ang kasamahan nitong nakaligtas sa ambush ay si Ruben Reli 62, may asawa, incumbent Barangay Captain ng Barangay Sugsugin, Del Gallego.
Ayon kay Chief Insp. Pelagio Samson Jr., spokesman ng Kampo Simeon Ola, ang insidente ay naganap dakong alas-3:00 ng hapon habang ang mga biktima ay sakay ng isang Toyota Innova na may plate no. SHY-429 na pag-aari ng munisipyo ng Del Gallego.
Napag-alaman na ang mga biktima ay binabagtas ang kahabaan ng naturang highway sa Barangay Bagacay ng bigla silang ratratin ng hindi nakilalang mga suspek. Namatay agad ang biktima habang nakaligtas naman ang kasama nito.
Malaki ang paniniwala ng pulisya na hindi ang barangay opisyal ang target ng mga suspek kundi ang nakasakay sa Mitsubishi sedan na kasunod nito na may dalang malaking halaga ng pera matapos mag-withdraw sa bangko.