MANILA, Philippines - Isang tama ng air gun sa katawan ang kumitil sa buhay ng isang apat na taong gulang na ba tang lalaki matapos itong aksidenteng mabaril ng kaniyang 5-anyos na kuya sa loob ng kanilang tahanan sa bayan ng Burgos, Pangasinan kamakalawa.
Dead-on-arrival sa Dasol Community Hospital sa bayan ng Dasol, Pangasinan ang biktimang kinilalang si Adrian Keith Navida, residente ng Brgy. San Miguel ng bayang ito.
Batay sa ulat ni Police Regional Office (PRO) 1 Director Chief Supt. Orlando Mabutas, naganap ang insidente sa tahanan ng mga biktima sa Brgy. San Miguel ng bayang ito bandang alas-4:30 ng hapon
Sa salaysay ng lolo ng mga bata na si Geronimo Navida Sr., iniwan niya ang dalawang apo na naglalaro sa labas ng kanilang bahay dahilan may tinatapos pa siyang trabaho.
Sa pag-aakalang laruan ay kinuha ng 5-anyos na kuya ng nasawi ang nakasukbit na airgun sa may bintana na inakala nitong baril-barilan saka iniumang sa nakababatang kapatid na kinalabit ang gatilyo.
Napatakbo ang matanda ng marinig ang malakas na putok ng baril sa loob ng kanilang bahay at laking gulat nito ng makitang duguan si Adrian na may tama ng bala sa kaliwang balikat.
Nagawa pang maisugod ang biktima sa pagamutan pero nabigo ng maisalba ang buhay nito habang na-trauma naman ang kaniyang kuya sa bilis ng pangyayari.
Kasalukuyan pang iniimbestigahan ng mga awtoridad ang kasong ito.