BULACAN, Philippiines — Kalunus-lunos na kamatayan ang sinapit ng tatlong kababaihan makaraang makulong at matusta sa nagliyab na kotse sa bahagi ng Barangay San Roque sa bayan ng Baliwag, Bulacan kahapon ng madaling-araw.
Nagmistulang uling ang mga katawan nina Raquel Mino, 28, dalaga; Jennifer Santos, 35, may-asawa, negosyante, kapwa nakatira sa Brgy. San Roque; at si Jubailyn Chua, 20, dalaga, ng Doña Enriqueta Subd., sa Barangay Bagong Nayon sa bayan ng Baliwag.
Lumilitaw sa pagsisiyasat ni PO2 Dante Castillo, tinatahak ng mga biktimang lulan ng kotseng Mazda 3 (ZNH-424) ang kahabaan ng Candaba Road sa nabanggit na barangay nang biglang sumabog ang unahang gulong ng kanilang sasakyan.
Nagtuluy-tuloy na sumalpok sa kongkretong pader ng Shiekainah Christian Church ang kotse kung saan naipit ang tatlong biktima.
Dito na nagliyab ang kotse dahil sa pagtagas ng gasolina kung saan agad na kumalat ang apoy sa loob ng sasakyan hanggang sa matusta ang mga biktima.
Agad namang sumaklolo ang mga tauhan ng pamatay-sunog subalit hindi na nailigtas ang mga biktima.