MANILA, Philippines - Tatlong araw matapos bumagsak ang chopper ng Philippine Navy, natagpuan na rin ang bangkay ng dalawang piloto noong Huwebes ng umaga sa karagatan ng Sta. Cruz Island, Zamboanga City. Ayon kay Navy spokesman Marine Lt. Col. Edgard Arevalo, unang nakita ang bangkay ni Lt. Junior Grade Gerald Tamayo sa kanlurang bahagi ng Little Sta. Cruz Islands bandang alas-7:11 ng umaga. Sumunod na nakita ang bangkay ni Lt. Tristan Joseph Corpuz dakong alas-7:25 naman ng umaga sa Great Sta. Cruz Island. Naunang iniulat na nawawala ang dalawa matapos mag-crash ang Bolkov helicopter PNH41 noong Martes ng umaga kung saan nakaligtas ang tatlong crew. Kasalukuyang nasa himpilan ng Naval Forces Western Mindanao sa Zamboanga City ang bangkay ng dalawa.