2 patay sa butete

MANILA, Philippines - Dalawa-katao ang iniulat na nasawi habang anim iba pa ang naospital makaraang malason sa iniulam na isdang butete sa bayan ng Santander, Cebu kamakalawa. Sina Rolando Tano, 48; at Alejandro Cuerpo, 51, ay namilipit sa sakit ng tiyan hanggang sa tuluyang bumigay sa ospital Isinugod naman sa ospital sina Irene Tano, 19, 3-buwang buntis na nasa kritikal na kondisyon; Lugi Tano, 13; Salvador Base, 48; Raymond Base, 16; at si Baldomero Base, 69. Sa police report na nakarating sa Camp Crame, dakong alas-7 ng gabi nang maghapunan ang mga biktima kung saan ang inulam ay isdang butete na mula sa pulutan ng kalalakihan na nag-iinuman. Gayon pa man, ilang oras matapos maghapunan ay nakaramdam ng pananakit ng ulo, tiyan, pagsusuka, pagkahilo at panghihina ang mga biktima kaya isugod ang mga ito sa ospital.