BATANGAS , Philippines — Kasalukuyang nakikipaglaban kay kamatayan ang isang vice mayor samantalang napatay naman ang kanyang bodyguard matapos na pagbabarilin ng mga ‘di-pa kilalang lalaki sa loob ng sementeryo sa bayan ng Talisay, Batangas kahapon ng umaga.
Ayon kay P/Supt. Arcadio Ronquillo, Batangas Public Information Officer, dumalo si Vice Mayor Florencio Manimtim Jr. sa libing ng kanyang ama sa Talisay Municipal Cemetery sa Barangay Poblacion nang lapitan at pagbabarilin.
Ayon sa ulat, nilapitan at binaril ng dalawang lalaki si Vice Mayor Manimtim habang nakatalikod sa puntod ng kanyang ama bandang alas-11:30 ng umaga.
Bago pa makaporma ang mga bodyguard ni Manimtim, agad din silang pinagbabaril kung saan napuruhan at napatay si Guillermo Macaraig, 57, ng Barangay Cale, Tanauan City.
Sugatan naman si Joel Caringal, 32, ng Brgy. Sampaloc, Talisay.
Nagtamo ng tama ng bala sa ulo si Manimtim na tumagos sa mukha at kasalukuyang nasa Mercado Hospital sa Tanauan City.
“Walang nakapansin sa barilan kasi mukhang isinabay ang pamamaril sa pagputok ng 21-gun salute,” pahayag ng isa sa nakasaksi sa insidente.
Nabatid na binigyan ng full military honour sa libing ang ama ng vice-mayor na si Florencio Manimtim Sr. na isang retiradong opisyal ng Philippine Air Force.
Napag-alamang si Vice Mayor Manimtim ay inakusahan nag-apruba ng maanomalyang pagtatayo ng Korean SPA sa bunganga ng bulkang Taal.
Si Vice Mayor Manimtim ay nanalo sa vice mayoralty race laban kay Jerry Natanauan noong May 10, 2010 elections kung saan naghain ng protesta si Natanauan at kasalukuyang dinidinig sa Tanauan Regional Trial Court dahil sa tatlong boto lamang ang kalamangan ni Manimtim.