Iniwan ng nobya, nagbigti

CAMP SIMEON OLA, Legazpi City, Philippines — Isang bangkay ng binata ang natagpuang naagnas ng kanyang mga kamag-anak na nakabigti sa isang puno sa Barangay Pascual, Libon, Albay kahapon ng umaga.

Nakilala ang biktima na si Christopher Ricamora 17-anyos, binata at resi­dente ng naturang lugar.

Ayon sa ulat ng pulisya, ang bangkay ng biktima ay natagpuan dakong alas-11:30 ng umaga na halos na­aagnas na ito na na­kabigti sa puno ng akasya may ilang metro ang layo sa kanilang bahay.

Napag-alaman na ang bikti­mang binata ay naki­kitira sa bahay ng kanyang tiya­hin na kung saan ito ay umalis noong nakaraang Sabado matapos na maki­paghiwalay dito ang kan­yang nobya.

Nauna dito, sinabihan pa ang biktima ng kanyang pinsan na huwag dam­da­min ang nangyari sa kanila ng kanyang nobya at hu­wag itong magbibigti.

Subalit laking gulat na lamang ng tiyahin at pinsan nito ng may makakita sa bangkay ng biktima na nakabitin sa puno ng akas­ya at naaagnas na.

Kaagad naman na dina­la ang naagnas na bang­kay ng binata sa punerarya upang ito ay isailalim sa awtopsiya upang mabatid kung may naganap na foul play sa pagkakamatay nito.