CAMP OLIVAS, Pampanga, Philippines - Kamatayan ang sumalubong sa mag-asawa habang dalawa nilang anak ay nasa kritikal na kalagayan matapos kumain ng eggplant omelet na aksidenteng nalagyan ng insecticide kamakalawa sa bayan ng Hermosa, Bataan.
Kinilala ng pulisya ang mag-asawa na sina Ricardo Sabado, 48 at Victoria Sabado, 42, kapwa nakatira sa Barangay Bacong sa nabanggit na bayan.
Kasalukuyan naman inoobserbahan sa Phil. General Hospital sina Rochelle Joy, 17 at Riyley James, 2.
Sa tala ng pulisya, si Ricardo ay namatay noong Huwebes ng umaga habang ginagamot sa Bataan General Hospital habang si Victoria naman ay nasawi bandang alas-7:59 ng gabi.
Nabatid na nalason ang mga biktima matapos aksidenteng maihalo ang insecticide (termite control) sa eggplant omelet na niluto ni Victoria para sa almusal ng pamilya noong Huwebes ng umaga.
Matapos makapag-almusal ay magkakasunod na sumakit ang tiyan, nahilo at sumuka kaya kaagad isinugod sa Dinalupihan District Hospital at Bataan General Hospital hanggang sa mailipat sa Phil. General Hospital kung saan namatay ang mag-asawa.
Sa salaysay ng nakatatandang utol ni Ricardo na si Matias Sabado, ang insecticide na inakalang arina ni Victoria ay nakalagay malapit sa kusina. Phil. Star News Service